November 28, 2025 (Zirtawpni) khan Presbyterian Bible School (PBS) chuan Batch 62-na pualin Farewell and Dedication Programme, Pi Zaii Hall, Synod Conference Centre, Mission Vengah an hmang.
Programme hi Rev. Lalengzika, Principal-in a kaihruai a, Rev. C. Lalsanglura, PBS zirtirtuin report a pe a, Rev. Dr. Rosiamliana Tochhawng, Executive Secretary i/c PBS-in zir chhuakte hnenah Certificate a hlan a, exam-a ti thate hnenah Upa Prof. R.L. Thanmawia, committee member-in lawmman a hlan a, class kai kim te hnenah Upa Vanlalsawma Siakeng, Synod Secretary-in lawmman a hlan a, Pu C. Awithanga Award chu Rev. B. Zohmangaiha, Synod Secretary (Jr.)-in a hlan a. Rev. V.L. Luaia Hranleh, Senior Executive Secretary-in zir chhuakte hnenah fuihna thuchah a sawi bawk.
PBS-ah hian a din tirh atangin tun thleng hian zirlai 2889 an awm tawh a, chung zinga 2424 chuan tha takin an pass tawh a. Tuna batch 62-naah hian zirlai 44 an awm a, an pass kim vek a ni.
Exam-a ti tha zual pathumte hnenah lawmman Rs.1000/-, Rs.700/-, Rs.500/- leh lawmpuina thuziak PBS Committee hminga hlan a ni a, chungte chu:-
1-na – Lalnunpuii Ralte d/o Vanlalruata Ralte, Thingsulthliah Kohhran
2-na – Ruth Vanlalhlui d/o Laltanpuia, Chaltlang Kohhran
3-na – Hauneihlala s/o L.T. Kapa, Zemabawk Kohhran te an ni.
Batch 62-na zirlai zingah hian class kai kim mi 16 hnenah lawmman Rs. 500/- theuh hlan a ni.
Kum 2014 atangin Christian Theology subject leh Kohhran Inrelbawlna & PCI Danpui subject-a ti tha ber te hnenah Pu C. Awithanga Award hlan thin a ni a. Batch 62-naah hian Kristian Theology subject leh Kohhran Inrelbawlna & PCI Danpui subject-ah Ruth Vanlalhlui’n a dawng a, award hian Rs. 2000/- a keng tel a ni.