November 3, 2025 (Thawhtanni) chawhma dar 10:00 khan Synod Trust Committee vawi 50-na chu Synod Committee Room I-ah an thu a, meeting hi Rev. R.C. Lalnghakliana, Synod Moderator-in a kaihruai a, Rev. V.L. Luaia Hranleh, Secretary-in report a pe.
Report-ah hian Mizoram Christian College (MCC) sak mek a nih thu leh hna thawh tur pumpui atangin 45% vel zawh a nih tawh thu te, Synod Hospital Centenary Building sak mek chu a ruhrel zawh fel a nih tawh thu te, Synod Office Annexe Building Extension hna thawh mek a nih thu te, Lunglei Synod House sak that tur lungphum phum a nih thu te, Hmangaihna In zawm belh hna thawh zawh tawh a nih thu te, ATC Dining Hall Extension hna thawh mek a nih thu te, Synod Higher Secondary School Boys’ Hostel sak a nih tur thu leh Gospel Centenary Khuangpui dahna sak that a nih tur thu te tarlan a ni.
Tun tum meeting-ah hian thurel tura chhawpchhuah 30 a awm a, chung zingah chuan Synod Press Building chungchang te, Synod Conference Centre chei that chungchang te, Silchar Mission Compund chei that chungchang te, Synod Revival Camping Centre kawng leh tual Blacktop chungchang te leh 2026-2027 budget te chu a langsar zual te an ni.