* October 27, 2025 (Thawhtanni) khan Theological Education Board (TEB) chu Committee Room - I, Synod Office-ah an thu a, hei hi kumina vawi 6 an thutna niin, budget session a ni nghal a ni. Meeting hi Rev. R.C Lalnghakliana, Moderator-in a kaihruai a, Secretary reports ngaihthlak a ni. 2026-2027 chhunga TEB budget tur ruahmanna leh Synod Inkhawmpui 2025-a TEB Report turte thlir ho a ni a. Hei bakah hian Tahan Theological College atanga dilna awm ngaihtuah a ni bawk.
* October 28, 2025 (Thawhlehni) khan Synod Hospital Board vawi 152-na chu JM Lloyd Hall, Synod Office-ah an thu. Meeting hi Rev. R.C Lalnghakliana, Moderator-in a kaihruai a, Secretary report ngaihthlak a ni. Kum 2026 leh 2027-a pension turte en ho a ni a, he mi bakah hian John Williams Hospital Managing Committee member ruat chungchang te, College of Nursing Principal ruat chungchang te, Assistant Nursing Superintendent ruat chuangchang te, House officer inrawihna dan ennawn chungchang te, Nursing Service hming thlak chungchang te, Kidney transplant ti thei tura hmalak chungchang te, Two Wheeler parking chung siam chungchang, Synod Hospital-ah lung lam enkawlna changtlung zawk a awm theih nana hmalak rawtna te, Post Anaesthesia Recovery Room (PACU) siamna tura building extend leh budget-a dah dilna te, Electric Power Distribution system tihchangtlun leh a in sak that dilna te, Synod hnuaia hna dilte Medical Fitness Certificate lakna man tlawm zawka tih rawtna Bial atanga lo lut ngaihtuah te, Synod Hospital-a security kal phung en that rawtna Presbytery atanga lo lut te, Synod Hospital leh John Williams Hospital additional budget chungchang te, Synod Hospital leh College of Nursing-a budget head thar dil ngai thlirho te, kum 2026-2027 chhung atana Synod Hospital, John Williams Hospital leh College of Nursing budget ruahmanna te leh Synod Hospital report tur thlir ho te chu thu ngaihtuah langsar zualte an ni.
* October 29, 2025 (Nilaini) khan JM Lloyd Hall, Synod Office-ah Synod Pastoral Committee an thu a, hei hi 2025 - 2027 term-a an vawihnih thutna a ni. Meeting hi Rev. R.C. Lalnghakliana, Moderator-in a kaihruai a, Upa Vanlalsawma Siakeng, Secretary-in report a pe. Thu ngaihtuah zingah kum 2026-a Pro. Pastor lak zat tur tihchian leh kum 2026-a Pastoral Ministry thupui tur thlan bakah Pastor Bial leh a kaihhnawih hrang hrang - Bial thar hawn, Bial then, Bial siam rem, Bial hming thlak leh Bial thut hmun chungchangte chu a langsar zualte an ni. Committee-ah hian member 97 an kal thei a, Aizawl khaw pawn atangin member 66, Aizawl chhung atangin member 31 an kal a ni.
* October 30, 2025 (Ningani) khan JM Lloyd Hall, Synod Office-ah Synod Education Board an thu a. Meeting hi Rev. R.C. Lalnghakliana, Moderator-in a kaihruai a, Secretary report ngaihthlak a ni. Report-ah hian Synod Higher Secondary School, P.C. Gilrs’ School, MPC Sikulpui leh PES te dinhmun hrang hrang tarlan a ni a. Supervisor of Schools (PES) boral thu leh a aiawh ruat a nih thute tarlan a ni. Tun tumah hian tha zawka PES enkawl dan tur chungchang te, PES (Middle School) zirlai bua Kristiana Vanram Kawngzawh thu telh ve chungchang te, PES hawn dilna te ngaihtuah a ni a. Hei bakah hian 2026-2027 atana School hrang hrangte budget ngaihtuah a ni bawk.
* Vawiin (Oct. 31, 2025) khan JM Llyod Hall, Synod Office-ah Synod Literature & Publication Board vawi 31-na an thu a, thu ngaihtuah tur pangngai pasarih (7) bakah 2026-2027 budget an thlirho a, Synod Inkhawmpui 2025-a report tur an thlirho bawk.
Meeting hi Rev. R.C. Lalnghakliana, Moderator-in a kai hruai a. Secretary report ngaihthlak niin, report-a a lan danin Kristian Tlangau chanchinbu chu copy 45,000 tihchhuah a ni a. Kristian Naupang copy 34,000 leh Synod Newsletter copy 1,41,000 tihchhuah a ni bawk. Heng thla kip chhuak chanchinbu enkawltu tur Editorial Board Member-te tarlan a ni a, lehkhabu 24 tihchhuah a ni bawk. Literature campaign/seminar neihpuiin hmun 36-ah an chhuak bawk a ni.
Thurel zingah Presbytery atanga lut Puitling Sunday School zirlaibu leh Nilai leh Beihrual Thupui bute uluk leh fel fai zawka kalpui rawtna te, Nilai leh Beihrual bua tawng dang awmte Mizo tawnga a lan dan uar zawka dah rawtna te, Synod House Style chungchang leh Thawnthu inphuahsiak buatsaihte chu a langsar zual an ni.