Rev. Dr. C. Lalthanzara (kum 51) chu October 21, 2025 tlai dar 6:30 khan a boral a, vawiin (Oct. 22, 2025) chawhnu dar 1:00 hian Mission Veng Kohhran Biak Inah Rev. R.C. Lalnghakliana, Synod Moderator-in a vui ang.
Rev. Dr C. Lalthanzara hi Pu C. Laldanga leh Pi B. Thangchhungi te fa pathum (mipa pahnih leh hmeichhe pakhat) zinga a mi lai niin Champhai Kahrawt-ah December 20, 1974 khan a lo piang a.
Kum 2005 April ni 14 khan Lalthanzawni d/o L. Thankunga (L) Mission Veng nen Champhai Kahrawt Kohhranah an innei a, fapa pathum an nei.
An fate:
1. C. Lalkhawngaihsanga (Kum 19)
2. C. Lalhruaizela (Kum 16)
3. C. Lalremruata (Kum 15)
Zirna lam:
Champhai-ah zirna tanin PUC thleng a zir a. Kum 1994 atangin ATC-ah B.Th zirin kum 1998 ah a zo a. Kum 1999 khan Theological Education Board (TEB)-in BD zir zawm tur a lak pahnih zingah telin kum 2002 khan zo a. Mamit Pastor Bial a vawn laiin M.Th (Christian Ministry) zir tura lak leh niin kum 2013-2015 chhung a zir leh a ni.
Kum 2017 atangin SATHRI (South East Asia Theological Research Institute), Senate of Serampore, West Bengal atangin D.Min (Doctor of Ministry) zirin, kum 2021 khan D. Min hi a zo a ni.
Rawngbawlna lam :
Kum 2001 Synod Inkhawmpui Durtlang Kohhrana neihah Pro- Pastor atan lak a ni a, kum 2004-a Dawrpui Kohhrana Synod Inkhawmpui chuan Pastor atan a nemnghet ta a ni. Rawngbawla a lo awm tawhna leh zirna a chhunzawm dan:
1. 2002 - 2004 : Pro Pastor - West Phaileng Pastor Bial
2. 2005 - 2009 : Bharatpur, Nepal
3. 2010 - 2012 : Mamit Pastor Bial
4. 2013 - 2015 : M.Th zirin ATC-ah
5. 2015 - 2019 : Kolkata Mizo Presbyterian Kohhran
6. 2020 - 2024 : Field Secretary- Jharkhand Mission Field
7. 2025 : Revival Dept-Synod Office
A mizia :
Rev. Dr. C. Lalthanzara hi mi inngaitlawm tak a ni a. A mawhphurhna pawh hlen chhuah ngei tum tlat mi a ni a, thiante tih sualah pawh mawh phur ngam, an tuar ai pawh tuar huam, damlo kan leh a bial mipuite tlawh peih em em a ni a. Tawng bawrh bawrh lo, kawm nuam leh zaidam tak a ni. Rawngbawlna ngai pawimawh mi a ni a, Pastor rawngbawlna pawh a hre chiang a, hlen chhuah ngei tum mi a ni. Tawng tam lo mah ni se, thusawi a thiam a; Bial a vawnnaah pawh tawng tam lo mah se, ngainat a hlawh hle. Rawngbawlna kawngah pawh hotute rin a kai a, rintlaka awm a, thawh tum thin mi a ni.
A nat dan :
Kum 2024 May thlaa Chaltlang Kohhrana PCI Biennial Assembly hmanga a kal chu May 11,2024 zanlai khan an awmna Dumka, Jharkhand a thleng a. A hnu lawk May 13, 2024 atang khan a nuam lo tan a. May 23, 2024 atangin a khua a sik a, a na ta riauva, a ke pawh a khai tha thei lova. May 25, 2024 khan inentir turin Kolkata an pan ta a.
Kolkata-ah hian Investigation te an tih hnuah May 29, 2024 khan Leukemia (Thisen cancer) a ni tih hmuh chhuah a ni. A result hriat a nih velah Chemo hmanga enkawl nghal a ni a. Chemo hi Cycle 8 lak tur a ni a, Kolkata-a Cycle hnih a lak hnuin Aizawlah enkawl chhunzawm a ni a. July 13, 2024 khan check up-in Kolkata an pan leh a, uluk ataka an en hnuah Cancer an hmu ta lova, an lawm hle.
July 18 2025 khan Aizawl-ah an rawn haw a, a lai hnuaiah bâwk te reuh te a awm bakah a pile a na leh a. January 31. 2025 khan Civil Hospital Aizawl-ah an inentir a, a nawm theih loh avangin February 11, 2025 khan Aizawl Hospital-ah admit a ni a, a mitah Lymphoma (Cancer chi khat) an hmu leh a. February 23, 2025 khan Kolkata panpui lehin HDU-ah dah nghal a ni a. Kolkata-ah hian Chemo nena enkawl a ni leh a, amaherawhchu a bâwk awm hi a reh mai theih loh avangin radiation hmanga enkawl a ni leh a. Hei bakah CAR T-Cell Theraphy hmanga enkawl zui a ni bawk a. Hemi hnu hian damdawi in atanga chhuakin, in luahin Kolkata-ah hian an awm ta nghal a. September thla atang khan a hnungah bâwk a rawn awm thar leh a, damdawi inah lut lehin an luh zan atang hian a zunah thi a chhuak a, Immuno Theraphy hmanga enkawl a nih hnuin September 26, 2025 khan damdawi in atangin an chhuak a.
Thisen mamawh fo a nih bawk si avangin September 29, 2025 khan Aizawlah rawn hawpui a ni a. A taksaa bâwk awm hi a rawn len zel avangte, a nate a zual zel avangin October 10, 2025 khan Synod Hospital Durtlang panpui a ni a. Doctor leh nurse ten theihtawp chhuaha an enkawl chungin October 21, 2025 tlai dar 6:30 khan nat leh hrehawm awm tawh lohna a Lalpa ângchhungah chatuana chawl turin a kal ta a ni.
VUINA PROGRAMME
A hmun : Mission Veng Kohhran Biak In
A hun : October 22, 2025 (Nilaini) chawhnu dar 1:00
Vuitu : Rev. R.C. Lalnghakliana, Moderator
Chanchin sawi : Upa Vanlalsawma Siakeng, Synod Secretary
Thlamuanna Thuchah : Rev. R.C. Lalnghakliana, Moderator
Zaipawl : Mission Veng Kohhran Zaipawl
Tawngtaisaktu : Rev. Dr Rosiamliana Tochhawng, Executive Secretary
Hla sak ho : ‘Pathian angchhung thianghlimah chuan’ KHB NO. 496
Malsawmna : Rev. Vanlalzuata, Finance Officer
Thlanmual
Hun hmangtu : Rev. Vanlalmuanpuia Khiangte, Mission Veng Bialtu Pastor