Synod Executive Committee (SEC) vawi 314-na chu J.M. Lloyd Hall, Synod Office-ah September 24 & 25, 2025 khan tluang taka neih a ni.
Tun tumah khan thurel tura chhawpchhuah 41 an nei a, chung zinga thurel langsar zualte hetiang a ni :
1. Central KTP hruaitu thlang loin ruat tawh tura pawm a ni : SEC 313:53 of June 25-27, 2025 chuan Central KTP Inkaihhruaina en that chu uluk takin an thlirho a. Hruaitu thlan chungchang chu OM-in lo zir chiangin rawtna nen SEC-ah rawn thlen leh rawh se, tia an rel angin SEC 314-naah hian OM rawtna chu ngaihtuah a ni a, SEC chuan a pawm ta a ni. SEC rel angin Central KTP hruaitu tur thlan thin chu inthlan awm tawh loin, ruat tawh tur a ni.
Aizawl khawpui Pastor Bial atanga ruat thin tur a ni dawn a. Pastor bial 49 chu hmun thumah (16+17+16) thenin, hmun hnih zel atangin Pastor bial tin atangin pakhat zel ruat an ni ang a, hmun khat hi term khat zel an awl ang. Committee Member-te chu term khat (kum hnih) chhung tan tur a ni ang.
Central KṬP Committee Member tur chu Bial KṬP Committee-in a ruat ang a, a ruatte chu Bial KṬP Committee Member țang lai, kum li (4) tal Bialah Office Bearer emaw, Committee Member emaw ni tawh an ni tur a ni.
Bial KTP-in Central KTP Committee Member tur a ruat chhuahte chu General Conference-ah pawm thin an ni ang.
2. Mizoram Presbyterian Kohhran kutah ruihhlo ngaite enkawlna Jordan Centre, Sethawn : Social Welfare, Women & Child Development Department, Govt. of Mizoram hnen atanga ruihhlo ngaite enkawlna Jordan Centre, Sethawn enkawl tura ngenna Mizoram Presbyterian Kohhranin kan dawn chu SEC 313 khan a lo ngaihtuah tawh a. "Social Front-in lo zir chiang se, SEC-ah la ngaihtuah leh ni se kan ti" tiin rel a ni (SEC 313:55 of June 25-27, 2025). Social Front Executive Committee chuan a zir chiang turin mi pathum a ruat a, an zir chianna te hi SEC 314-ah an thlen leh ta a ni.
Zir chiannate thlirin, SEC chuan ngun takin a ngaihtuah a. Heti lam kawnga rawngbawlna hi kan ramin a mamawh leh tul em em a ni a, ram hmangaihna avangin SEC chuan lak mai tha a ti a, rorelna sang ber Synod a thlen turin a pawm ta a ni.
Jordan Centre, Sethawn lak leh lak loh chungchang chu Synod Inkhawmpui Vawi 102-na, Zarkawt Kohhran Biak Ina neih turah thutlukna siam a ni ang.
3. Synod Hospital leh John Williams Hospital-in MUHCS zawm chungchang : Hun rei tak Sawrkar hotute leh Synod hruaitu (OM member) ten Mizoram Universal Health Care Scheme (MUHCS) zawm chungchangah inremna kawng an zawn hnuin Synod Executive Committee vawi 314-na, September 24 - 25, 2025-a thu chuan Synod Hospital, Durtlang leh John Williams Hospital, Lunglei-in MUHCS zawm chu a remti ta.
Mizoram Sawrkar-in April 1, 2025 atanga a kalpui MUHCS hi Synod Hospital, Durtlang pawh empaneled hospital ni ve turin a duh a. OM-in MUHC a zir chianna chu SEC-ah a thlen a, SEC chuan, "Mizoram Universal Health Care Scheme chungchang hi OM-in lo zir chiang zelin, a tul a tih hunah SEC-ah rawn thlen leh mai rawh se kan ti" tiin a rel a (SEC 313:21 of June 25-27, 2025). OM chua hma a lak dan leh an zir chianna chu SEC 314-ah a rawn thlen leh ta a ni.
SEC chuan zir chiangtute zir chianna leh rawtnate a ngaihtuah hnuah Mizoram Presbyterian Kohhranin damdawi in kan neih pahnihte - Synod Hospital, Durtlang leh John Williams Hospital, Lunglei-in Mizoram Universal Health Care Scheme (MUHCS) a zawm chu rem a ti ta a ni.
Memorandum of Agreement chungchanga tihfel ngai awm ang angte lo bawhzui turin SEC chuan OM kutah a dah a. Tih fel ngaite tih fel a nih hnuah Synod Hospital-ten MUHCS an zawm hun tur a hriat dawn a ni.
4. Khawngaihna In tan Synod ram hman hawh phal : Synod Prison Ministry-in a thawhpui mek, jail tang chhuak, hawna tur nei lo leh khawlaia tal mai maite enkawlna hmun Khawngaihna In, Chite venga mi chu an hmunhma-in a zawh tawh loh avanga Pu Vanlalngaia'n Synod hnena ram a pek chu hman hawh dilpui a ni a. Synod Prison Ministry leh Khawngaihna In thawhho dante, Khawngaihna In dinhmun leh hmun hma an mamawh dante ngahtuahin SEC 314 chuan an dilna hi a remti a, Pu Vanlalngaia'n Synod tana ram a pek chu Khawngaihna In hian an hmang dawn ta a ni.
Pu Vanlalngaia, Kulikawn hian Hlimenah 7.5 bighas zeta zau ram a nei a. Ruihhlo ngaite chhanchhuahna hmanrua atan a lo tangkai theih hlauh takin tiin, May 9, 2025 khan Synod kutah a hlan a ni. He lai hmun hi jail tang chhuak, hawna tur nei lote enkawlna atana duhthusam, hmun fianrial, chakkhai lamna hla lutuk si lo a ni a. Synod Prison Ministry-in a thawhpui Khawngaihna In chu Chite veng atangin Hlimen ramah hian sawn a ni dawn ta a ni.