Teachers’ One Day Training programme neih a ni
September 11, 2025 (Ningani) khan Presbyterian English School buatsaihin East Phaileng leh a chhehvela PES hrang hrang – East Phaileng PES, Khanpui PES, Khawruhlian Vengthar PES, Kepran PES leh Sesawng PES te tan Teachers’ One Day Training Programme, East Phaileng Kohhran Centenary Hall-ah neih a ni a, he hun hi Upa P.C. Vanlalhruaia, Supervisor of Schools, Upa Lalthanzama, BEC Member, Rev. Malsawmdawngliana, BEC Member leh Nl. Lawmsangzuali, O/A ten an hmanpui.
Programme hi hun thumah then a ni a, hun khatna hi Rev. Lalmakpuia, East Phaileng bialtu Pastor-in a kaihruai a, Resource Person Upa Lalthanzama hnen atangin ‘Classroom Management’ tih thupui ngaihthlak a ni a, hun hnihnaah ‘Zirtirtu mawhphurhna thenkhatte’ tih thupui Resource Person Rev. Malsawmdawngliana hnen atangin ngaihthlak a ni a, hun thumna hi Upa P.C Vanlalhruaia, Supervisor of Schools-in a kaihruai a, hemi hunah hian thupui hrang hrang zir ho atangin sawi hona bakah zawhna leh chhanna hun hman a ni.
Tun dinhmunah PES hnuaiah School 172 an awm a. Zirlai 35,741 an awm a, zirtirtu leh thawktu dang 2,230 an awm mek a ni. East Phaileng leh a chhehvel PES hrang hrangah hian zirlai 674 an awm a, thawktu 50 an awm a ni.
Kohhran Hmeichhia
September 6, 2025 (Inrinni) khan Synod Conference Centre, Mission Vengah Central Kohhran Hmeichhe buatsaihin HIV/AIDS inzirtirna Trainers’ Training neih a ni a. Hemi hunah hian NexGen Organization atangin mi thiamten hun an hmang a ni.
Social Front
September 6-7, 2025 chhung khan Lungpho Bial chhung Kohhranah Moral Reforms Awareness campaign neiin campaigner-te, Rev. Lalrinmawia, Rev. K. Lalrinmawia, Rev. Z. John Malsawma Colney leh Upa Dr. Lalrintluanga te an kal.
September 7, 2025 (Pathianni) khan Kulikawn Bialah Thianghlim taka sum lakluh inzirtirna campaign neiin campaigner-te, Rev. Dr. H. Lalnunmawia, Rev. Zaithanmawia Pachuau leh Rev. Lalfakawma te an kal.
SL&PB
September 6-7, 2025 chhung khan Bungtlang Bial chhung Kohhranah Literature Campaign leh Seminar neihpuiin Rev. P.B. Zosapthara, Editor leh Upa Lalrammawia Ngente, BEC member-te an kal.
Finance
September 6-7, 2025 chhung hian Saitual Bialah Finance Campaign nei turin thawktute, Upa F. Lalhmangaiha, Upa David Lalnunfela leh Upa C. Lalbiakthanga te an kal ang.
MSSU
September 6, 2025 (Inrinni) khan Sunday School zirtirtu training neihpuiin trainer-te hetiang hian an chhuak:
Kolasib Hmarveng Kohhranah Upa Hrilthansanga, Upa Isak Zarzoliana Chhangte leh T.Upa B. Malsawmtluanga
Lungsen Kohhranah Upa K. Zoremsanga leh Upa C. Lalbiaksanga
Synod Relief Fund
Tun hnaia harsatna hrang hrang tawkte hnenah hetiang hian Synod Relief Fund pek a ni.
Airfield Venga damlo leh khawsak harsa chhungkaw pathum hnenah Rs.10,000/- theuh, Saikhawthlir khuaa khawsak harsa chhungkaw pathum hnenah Rs.10,000/- theuh, T. Daijang (Manipur)-a damlo mi pahnih hnenah Rs.10,000/- ve ve, Khawkawn khuaa damlo mi pahnih hnenah Rs.10,000/- ve ve, Zemabawk Berawluia damlo mi pakhat hnenah Rs.10,000/-, Sihphir khuaa damlo mi pakhat hnenah Rs.10,000/-, Sakawrtuichhuna damlo mi pakhat hnenah Rs.10,000/-, Cherhlun khuaa damlo mi pakhat hnenah Rs.10,000/-, Chhingchhip Venglaia damlo mi pakhat hnenah Rs.10,000/- leh Ratu khuaa damlo mi pakhat hnenah Rs.10,000/- pek a ni.
August thla chhunga harsatna hrang hrang tawkte hnena Synod Relief Fund atanga chhawmdawlna sem zat chu Rs.4,92,000/- a ni.