August 20, 2025 (Nilaini) khan Presbyterian English School buatsaihin Kawlkulh leh a chhehvela PES hrang hrang – Kawlkulh PES, Lungpho PES, Hliappui PES, Rullam PES leh Chhawrtui PES te tan Teachers’ Training Programme, Kawlkulh Kohhran Hall-ah neih a ni a, he hun hi Upa P.C. Vanlalhruaia, Supervisor of Schools-in a hmanpui.
Programme hi hun li-ah then a ni a, hun khatna hi Rev. R.K. Lalnunmawia, Kawlkulh bialtu Pastor-in a kaihruai a, Resource Person Upa Dr. Lalrintluanga hnen atangin ‘Zirlaite leh zirtir dan’ tih thupui ngaihthlak a ni a, hun hnihnaah ‘CCE chungchang’ tih thupui Resource Person Pu Vanlalmuanpuia hnen atangin ngaihthlak a ni a, hun thumnaah ‘Zirna leh Zirtirtu’ tih thupui Resource Person Upa Dr. Lalrintluanga hnen atangin ngaihthlak leh a ni. Chawhnu dar 2:45 atanga dar 4 chhungin hun li-na hman leh a ni a, hemi hunah hian thupui hrang hrang zir ho atangin sawi hona bakah zawhna leh chhanna hun hman a ni.
Tun dinhmunah PES hnuaiah School 172 an awm a. Zirlai 35,741 an awm a, zirtirtu leh thawktu dang 2,233 an awm mek a ni. Kawlkulh leh a chhehvel PES hrang hrangah hian zirlai 534 an awm a, thawktu 46 an awm a ni.