July 25, 2025 (Zirtawpni) khan Mizoram Christian College chuan Vanapa Hall-ah Freshers’ Social and Felicitation (Zirlai tharte lawmna leh zirlai tithate chawimawina hun) an hmang.
He hun hi KC Lalthansanga leh Dr. Vanlalpari ten an kaihruai a, kalkhawmte lawmna thu sawitu Principal Upa Dr. Tawnenga chuan zirlai thar mi 132 te chu "Pathian leh kan ram tan" tih thupui vawng tlat turin, ram leh hnam tan thiamna kawngah te, an nungchang leh an thlarau nun thlenga kaihruai tura an lo lawm luh thu sawiin, zirlai tharte chu zirna mai piah lamah khua leh tui tha leh mi rintlak nih tum turin a fuih a ni.
Khuallian Pu Lalduhawma, Chief Minister pawhin thu sawiin, Synod-in Secular college tha leh rintlak tak a din chu lawmawm a tih thu a sawi a. MCC chu Mizo thalai tam zawk chher chhuaktu a nih theih nan sawrkarin pui se, zirna kawnga Mizo hnam hmasawnna ropui tak thlentu college a nih ngei a beisei thu a sawi a. Mizoram zirnain hma a sawn zel theih nana ngaihtuahna sen a nih mek thu leh State University din tura hma lak chhoh mek a nih thu a sawi bawk.
He hunah hian MCC zirlai kal chhuak University Rank Holder leh Department topper te chawimawina hlan a ni a. Zirlaite aiawhin C. Lalremsiami, 3rd Semester leh zirlai lawm luh tharte aiawhin Laltlanhlui, 1st Semester ten thu an sawi a, MCC Art & Music Club leh Chuailo Cultural Club ten hun an hmang bawk.
