Synod Bookroom chuan July 14-19, 2025 chhung atan kum danga an lo tih thin angin Reduction Sale an buatsaih leh mek. Reduction Sale neih chhung hian zing dar 8 atanga tlai dar 5 thleng a duh apiang tana dawr theih turin hawn thin a ni ang.
Reduction Sale hi Mizoram puma Synod Bookroom Branch hrang hrang bakah Distribution pahnih leh Churachanpura Tuithaphai Branch Synod Bookroomah te neih a ni.
Reduction Sale-ah hian Synod Bookroom-a lehkhabu zawng zawng, Bible, Kristian Hlabu, Communion thil, Kohhran mamawh chi hrang hrang, Stationery Item zawng zawng leh School Naupang mamawhte 5% - 80% discount-in hralh chhuah a ni a. A tan tirh ni atangin mipuiin an hlut hle.
Synod Bookroom Reduction Sale hi a rualin Mizoram pumah tukin zing khan tan a ni a. Branch hrang hrangah Branch Committee ruahmannain hawnna hun hman a ni a, Headquarters Mission Vengah chuan Rev. Dr. K. Lallawmzuala, Synod Executive Secretary, i/c PRESCOM chuan Reduction Sale hi Pathian hnena hlanin Kohhran mipuite’n tangkai taka an hman theih nan a hawng a ni.
