Vawin (June 25, 2025) chawhma dar 10:00 atang khan Synod Executive Committee (SEC) vawi 313-na chu J.M. Lloyd Hall, Synod Office-ah neih tan a ni a, member 136 an kal. Tun tum committee hian June 27, 2025 (Zirtawpni) thleng a awh ang.
Meeting hi Moderator, Rev. R.C. Lalnghakliana’n a kaihruai a, Upa Vanlalsawma Siakeng, Synod Secretary-in report a pe a, Rev. Dr. K. Lallawmzuala, Finance Officer-in report a pe bawk.
Secretary report-ah hian KTP Rorel Inkhawm leh Kohhran Hmeichhe Inkhawmpui Lian tluang taka neih a nih thu te, Upper Assam Mission Field hawn a nih thu te, Masihi Sangati (Kawl) Pastor induction neih a nih thu te, Bairabi Presbytery thar hawn a nih thu te, P.C. Wales General Assembly hmanpui tura sawmna dawn a nih thu te, Pu Vanlalngaia, Kulikawn chuan Synod kuta ram a pek thu te, Mizoram Presbyterian Kohhran leh Presbyterian Church of Myanmar te thawhhona atana Partnership Working Committee din a nih thu te, Magnetic Resonance Imaging (MRI) khawl thar lei a nih thu te, Presbyterian Church, Wales hnen atangin Synod Hospital, Durtlang leh John Williams Hospital, Lungleia nau neihna Ward (Maternity Ward) leh Synod Hospital, Durtlang K. Ward tihchangtlunna tur tanpuina dawn a nih thu te, Nephrology Ward thar hawn a nih thu te, Ruihhlo ngaite pual camping neih a nih thu te leh RC leh RL pek chhuah dan te tarlan a ni.
Tun tumah hian thurel tura chhawp chhuah 57 a awm a. Chung zingah chuan Synod House Style enthat chungchang te, Manipur Synod leh Zou Synod nena thawhhona thuthlung pawhsei chungchang te, Music Instructor post ruak pakhat hnawh khah chungchang te, ATC Library building chungchang te, PRESCOM Manual 2022 leh KTP inkaihhruaina enthat chungchang te, Kum 2028 Nilai leh Beihrual thupui Lesson Plan chungchang te chu a langsar zualte an ni.
For more Pics Click Here