Rev. Dr. H. Vanlalauva (kum 77) pensioner chu nizan (June 22, 2025) dar 8:48 khan Ebenezer Hospital-ah a thi a, vawiin (June 23, 2025) chawhnu dar 1:00 hian Leitan South Kohhran Biak Inah Rev. R. Vanlalnghaka, Ex-Moderator-in a vui ang.
Pian leh mûrna
Rev. Dr. H. Vanlalauva hi kum 1948 Nov. 24 khan Leithum khuaa Pu Khawneihthiauva leh Pi Lalthangi te nupa karah a lo piang a. An unau hi an vaiin 10 an ni a, mipa paruk leh hmeichhe pali an ni.
Kum 1976 Dec. 16 khan Upa K. Zangira fanu Lallianpuii Khiangte nen Ramhlun North Kohhran Biak Inah an innei a, fa pathum - mipa pahnih leh hmeichhe pakhat an nei a. A nupui Pi Lallianpuii hian kum 2016 July 6 khan chatuan ram a lo pansan tawh a ni.
Zirna lam
Rev. Dr. H. Vanlalauva hian an khua, Leithum atangin kum 1958 khan Lower Primary a zo a, Vanzauah Middle School a kal chhunzawm a. Kum 1963 khan Khawbung High School-ah Class VII a zir a, amaherawhchu kum 1966-a Mizoram a buai tak avang khan zirna hi kum hnih chhung lai chu a chawlhsan a ni. Zirna a chawlhsan chhung hian an khuaah Kohhran leh YMA-ah a tangkai thin hle.
Kum 1968 khan zirna chhunzawm turin a u te hnenah Shillong-ah a chhuk a, zirna a chhunzawm leh ta a. Kum 1969 khan Shillong Govt. High School atangin Assam Secondary Education Board hnuaiah Matric chu First Division-ah a zo a, subject thenkhatah Letter a hmu pha hial a. St. Edmund’s College atangin PU a pass leh a. Hemi hnu hian LDC hna thawk chungin St. Anthony’s College-ah a zir a, kum 1973 khan B.A. a zo va, kum 1975 khan Guwahati University atangin MA (Economics) chu a pass ve leh ta a ni.
Rawngbawlna lam
Rev. Dr. H. Vanlalauva hi naupang te a nih atangin Bible chhiar leh zai ngaina tak mi a ni a, Sunday School a ngai pawimawh em em bawk. Kum 4 mi a nih atangin Sunday School a kai tan a, Beginners a nih atang hian kum tin Sunday School kai tha lawmman pawh a dawng thin.
Kum 1960-62 lai vel khan pianthar harhnain Aizawl leh a chhehvel a tuam a. Hetih hunlaia Leithum mi, Aizawl Theological School-a kal C. Kaphuliana (a hnua pastor ta) thusawi atangin a ute nen chhandam nih inhriatna an nei a. Piantharna erawh a naupan tet atanga chhungkaw kaltlanga chang tawh a ni.
Shillong leh Guwahati-a lehkha a zir lai hian Shillong Mizo Kohhrana kum 1970-a Youth Fellowship a din tirh atangin hruaitute zingah a tel a. Zaipawl rawngbawlna lamah pawh a inhmang rim hle a. Male Voice hriat hlawh tak - ‘A hmangaihna Faktute’ zingah pawh kum 1971 atangin a tel bawk. ZPMK Gospel Team-ah telin Mizoram hmun hrang hrangah rawngbawlin a tel thin bawk. Shillong-a a awm chhung hian Shillong Mizo Kohhran Committee-ah te telin, Kohhran Secretary hna te a chelh tawh bawk a.
Kum 1976 khan Ramhlun North Kohhran kal tlangin Pathian thu zir a dil a, Synod chuan United Theological College (UTC)-a BD zir turin a la ta a. Kum 1981 khan BD hi a zir zo va, Aizawl Theological College-ah a thawk zui nghal a. BD result a chhuah veleh Pro. Pastor dil zui nghalin, kum 1981 Synod Inkhawmpui chuan Pro. Pastor atana lain, kum 1982 atang khan Aizawl Theological College-a zirtir hna thawk chungin Chaltlang Bialah te, Dawrpui Vengthar Bialah te leh Bungkawn Bialah te Pro. Pastor-in a awm a.
Kum 1983 khan Synod chuan M.Th zir turin a thlang a, kum 1984 June thla atangin UTC-ah M.Th a zir a, kum 1986 khan zovin, ATC-ah zirtir hna thawk chungin Bungkawn Bialah Pro. Pastor hna a thawk chhunzawm leh a. Hemi kuma Synod Inkhawmpui chuan Pastor atan a nemnghet ta a ni.
Kum 1988-89 chhung khan Serampore College-ah a thawk a, kum 1990 khan D.Th. a zir leh a. John Calvin-a theology-a doctorate degree la tur a nih avangin Edinburgh University, Scotland leh Geneva University, Switzerland-ah te research te a tih hnuah kum 1996 khan Doctorate Degree hi a dawng ta a ni. Doctorate Degree a dawn hnu hian Aizawl Theological College-ah Calvin Study Centre hawn a ni a, Centre Director hna a thawk a. Kum 1998 December thla atangin Aizawl Theological College Principal atan SEC chuan a thlang a, kum 2008 thleng khan Principal hna a thawk a. Kum 2007 khan Synod Moderator niin, kum 2009 khan pension-in a chhuak ta a ni. A pension hnu pawh hian ATC-ah hun rei tak chu rawih zui a ni.
A thih ni thleng hian Synod hnuaia Committee pawimawh tak takah te a tel a. Pastoral Committee-ah kum 10 a tel hman a, Synod Executive Committee-ah hian term 4 awm tawhin, Synod Nomination Committee-ah tum hnih a awm tawh bawk. Heng bakah hian Theological Education Board, Finance Committee, Music Committee, Pension & Provident Fund Board, Property Committee (tuna Trust tih ni ta), Synod Service Board leh Committee peng dang dangah te a awm tawh a. A thih ni thleng hian Research Based Kohhran Hmathlirah Convener a ni bawk.
Synod chhung mai bakah PCI Executive Committee member a ni tawh a, BSI Aizawl Auxiliary President ni tawhin tunah hian Chief Translator a ni mek bawk. NEICC Theological Committee-ah te, Serampore College (University) Senator-ah te, Senate Executive Committee-ah te, Dean of SATHRI/Dept. of Research-ah te pawh a lo awm tawh bawk.
Thuziak lam
A theih ang angin thuziak rawngbawlna lamah a inhmang a. Sap tawng leh Mizo tawngin lehkhabu eng emaw zat a ziak tawh a. Sap tawnga lehkhabu a ziakte hi Doctrine of God, Lectures in Christian Doctrines, The Theology of John Calvin, Doing Mission in India, God of Life: Lead us to Justice and Peace, Methodological Issues in Theological Research: An Exploration Vol I & II, A Quest for A Living Theology te an ni a.
Mizo tawngin lehkhabu eng emaw zat a ziak tawh a. Senior Dept zirlaibu, Puitling Sunday School zirlaibu, Nilai leh Beihrual thupui bu, Khawvel Sunday School Ni zir lai bakah lehkhabu rotling, Mizo tena Reformed Theology kan hriatna tur atana tangkai tak takte a ziak tawh a. A nupui, Pi Lallianpuii thih champha phak pualin July 5, 2025-a tihchhuah tur ‘Calvin’s Ecclesiology in relation to the Mizoram Presbyterian’ pawh a peih fel leh tawh a, a tihchhuah hmain a kalsan ta a ni.
Hun hnuhnung lam
Rev. Dr. H. Vanlalauva hian hun eng emaw ti atang khan thisen sang leh zunthlum a nei a, a inenkawl ve reng a. Kumin kum tir atang khan insawiselna nei em em nei si lovin a taksa a chak lo zual a. Tunhnaiah a ha a nat avangin doctor a inentir a. June 17, 2025 (Thawhlehni) khan a pum nawm loh avangin Synod Hospital, Durtlangah a inentir a, Doctor ten ngun taka en ngaia an hriat avangin an lo admit a. June 18, 2025 khan CT Scan an ti a, CT Scan result atang chuan a pumpuiah bâwk a awm tih hmuhchhuah a ni a; cancer nia ringin, Ebenezer Hospital-ah refer a ni a. Ebenezer-ah hian June 20, 2025 (Zirtawpni) khan admit a ni a, a tuk, June 21 (Inrinni) ah zai nghal a ni a; a pumpui cancer hi beisei aiin a lo nasa hman tawh tih hmuh chhuah a ni a. An zai zawh hian HDU-ah dah nghal a ni. June 22, 2025 (Pathianni) chawhnu lam atang khan a BP a tlahniam a, Doctor leh nurse ten theihtawp chhuahin an vil reng a. A chau hret hret a, theihtawp chhuah a ni nachungin, June 22, 2025 (Pathianni) zan dar 8:48 khan a rawng a bawl, Lalpa hnenah chatuana chawl turin a kal ta a ni.
VUINA PROGRAMME
A hmun : Leitan South Kohhran Biak In
A hun : 23.6.2025 dar 1:00 PM
Vuitu : Rev. R. Vanlalnghaka, Ex-Moderator
Chanchin sawi : Rev. V.L. Luaia Hranleh, Senior Executive Secretary
Thlamuanna thuchah : Rev. R. Vanlalnghaka, Ex-Moderator
Zaipawl : Leitan South Kohhran Zaipawl
Tawngtaisaktu : Rev. Vanlalzuata, Finance Officer
Hla sak ho : ‘Khawvel hi bo mah se’ KHB No. 150
Malsawmna : Rev. Dr. K. Lallawmzuala, Executive Secretary
Thlanmual
Hun hmangtu : Rev. Dr. Tlanghmingthanga, Principal, ATC